പാലക്കാട് ജില്ലാ പോലീസ് മേധാവി ശ്രീ R.ആനന്ദ് IPS സമർപ്പിച്ച ശുപാർശയിൽ ബഹു. തൃശ്ശൂർ റേഞ്ച് പോലീസ് ഡെപ്യൂട്ടി ഇൻസ്പെക്ടർ ജനറലായ ശ്രീമതി. എസ്. അജീതാ ബേഗം IPS, അവർകളുടെ ഉത്തരവ് പ്രകാരം നിരവധി ക്രിമിനൽ കേസുകളിൽ പ്രതിയായ പാലക്കാട് ജില്ല തൃത്താല പോലീസ് സ്റ്റേഷൻ പരിധിയിൽ താമസിക്കുന്ന മുഹമ്മദ് അലി @ ബാബു, വയസ്സ്. 40, S/o. ഉണ്ണിമൊയ്തു, മീനാനിക്കോട്ടിൽ വീട്, ആലൂർ, പട്ടിത്തറ, തൃത്താല, പാലക്കാട് എന്നയാളെ കേരള സാമൂഹ്യ വിരുദ്ധ പ്രവർത്തനങ്ങൾ (തടയൽ) നിയമം വകുപ്പ് 15 ചുമത്തി നാടുകടത്തി.
കാപ്പ നിയമം 15(1)(a) പ്രകാരം പാലക്കാട് റവന്യൂ ജില്ലയിൽ പ്രവേശിക്കുന്നതിൽ നിന്നും 6 മാസത്തേക്കാണ് പ്രവേശന വിലക്ക് ഏർപ്പെടുത്തിയിട്ടുള്ളത്. ഉത്തരവ് ലംഘിച്ചാൽ മൂന്നു വർഷം വരെ തടവു ശിക്ഷ ലഭിക്കാവുന്നതാണ്.
ജില്ലാ പോലീസ് മേധാവിക്കുവേണ്ടി തൃത്താല പോലീസ് സ്റ്റേഷൻ ഇൻസ്പെക്ടർ വിമൽ.വി.വി തുടർ നടപടികൾ സ്വീകരിച്ചു. പാലക്കാട് ജില്ലയിൽ തൃത്താല പോലീസ് സ്റ്റേഷനിലും, തൃത്താല എക്സൈസ് റേഞ്ചിലുമായി നിരോധിത ലഹരിവസ്തുക്കൾ കൈവശം വച്ചതിന് കേസുകൾ നിലവിലുണ്ട്.
NDPS നിയമത്തിൽ പ്രതിപാദിക്കുന്ന യാതൊരുവിധ അധികാരപത്രമോ രേഖയോ ഇല്ലാതെ മയക്കുമരുന്ന് ഇനത്തിൽപ്പെട്ട MDMA, മെത്താഫെറ്റാമിൻ എന്നിവ ഉപയോഗത്തിനും വിതരണത്തിനുമായി കൈവശം വയ്ക്കുക തുടങ്ങിയ കുറ്റങ്ങളിൽ ഏർപ്പെടതിനാണ് മുഹമ്മദ് അലി @ ബാബുവിനെതിരെ കാപ്പ ചുമത്തിയിട്ടുള്ളത്.
2023 വർഷത്തിൽ പാലക്കാട് ജില്ലയിൽ തൃത്താല പോലീസ് സ്റ്റേഷൻ പരിധിയിലുള്ള ടിയാന്റെ വീട്ടിൽവച്ച് മെത്താഫെറ്റാമിൻ പിടിച്ചെടുത്തതിന് കേസിൽ പ്രതിയായതിനെ തുടർന്നാണ് കാപ്പ നടപടികൾ സ്വീകരിച്ചത്.
