തൃത്താല:വധശ്രമക്കേസിലെ പ്രതിയെ വീടിന്റെ മച്ചിൽ നിന്ന് പിടികൂടി പൊലീസ്. കപ്പൂർ കാഞ്ഞിരത്താണി സ്വദേശി സുൽത്താൻ റാഫിയാണ് തൃത്താല പൊലീസിൻ്റെ പിടിയിലായത്. പാലക്കാട് തൃത്താലയിലാണ് സംഭവം.
ഞാങ്ങാട്ടിരിയിൽ വച്ച് യുവാക്കളെ മർദ്ദിച്ച സംഭവത്തിൽ വധശ്രമത്തിന് സുൽത്താൻ റാഫിക്കെതിരെ പൊലീസ് കേസെടുത്തിരുന്നു. ആക്രമണത്തിന് പിന്നാലെ ഒളിവിൽ പോയ സുൽത്താ റാഫിയെ കണ്ടെത്താൻ പൊലീസ് അന്വേഷണം വ്യാപിപ്പിച്ചിരുന്നു.
കഴിഞ്ഞദിവസം ഞങ്ങാട്ടിരിയിലെ വീടിന് സമീപത്ത് നിന്നും സുൽത്താൻ റാഫിയുടെ മൊബൈൽ ഫോൺ ഓൺ ആവുകയും ഇത് പോലീസ് കണ്ടെത്തുകയും ചെയ്തു. ഇയാൾ ഇടയ്ക്ക് വീട്ടിൽ വന്നു പോകാറുണ്ട് എന്ന് പോലീസിന് വിവരം ലഭിച്ചിരുന്നു. വീട്ടിൽ രഹസ്യ അറയുണ്ടെന്നും പോലീസ് കണ്ടെത്തിയിരുന്നു.
മൊബൈൽ ഫോൺ ലൊക്കേറ്റ് ചെയ്ത് നടത്തിയ പരിശോധനയിൽ പോലീസ് സുൽത്താന്റെ വീടു വളഞ്ഞു. തുടർന്ന് നടന്ന പരിശോധനയിലാണ് വീടിൻറെ മച്ചിലുള്ള രഹസ്യ അറയിലേക്കുള്ള വഴി കണ്ടെത്തിയത്. മച്ചിന് മുകളിൽ ഒളിച്ചിരിക്കുന്ന പ്രതി സുൽത്താൻ റാഫിയെ പോലീസ് പിടികൂടുകയായിരുന്നു.
