ദേശമംഗലം : കേടായ ബൈക്ക് സ്റ്റാർട്ട് ചെയ്യുന്നതിനിടെ തീ പടർന്ന് ഗുരുതര പരിക്കേറ്റ യുവാവ് മരിച്ചു. ഗ്രാമപഞ്ചായത്തിലെ പതിനൊന്നാം വാർഡിൽ ഉൾപ്പെടുന്ന മേലെ തലശ്ശേരി ജുമാമസ്ജിദിൽ സമീപം താമസിക്കുന്ന അത്താണിക്കൽ വീട്ടിൽ മുസ്തഫ എന്നവരുടെ മകൻ മുഹമ്മദ് ഫാരിസ് ( 22 ) എന്ന യുവാവാണ് മരണപ്പെട്ടത്.
കഴിഞ്ഞ ചൊവ്വാഴ്ച ഉച്ചയ്ക്ക് 3 മണിയോടെയാണ് അപകടം നടന്നത്. മുഹമ്മദ് ഫാരിസ് ജോലി ചെയ്തിരുന്ന ചിറ്റണ്ടയിലെ ഇരുചക്ര വാഹന വർക്ഷോപ്പിൽ വെച്ച് കേടായ ബൈക്ക് സ്റ്റാർട്ട് ചെയ്യുന്നതിനിടെ പരിസരത്ത് സൂക്ഷിച്ചിരുന്ന പെട്രോൾ കുപ്പിയിലേക്ക് തീ പടരുകയും അത് മുഹമ്മദ് ഫാരീസിന്റെ ശരീരത്തിലേക്ക് പടർന്ന് തീ ഗോളമായി മാറുകയും ആയിരുന്നു. പരിക്കുപറ്റിയ മുഹമ്മദ് ഫാരിസിനെ ഉടൻതന്നെ തൃശ്ശൂർ ഗവ: മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. 90 % പൊള്ളലേറ്റ് അതീവ ഗുരുതരാവസ്ഥയിലായിരുന്ന ഫാരിസ് ഇന്ന് അർദ്ധരാത്രി രണ്ടു മണിയോടെയാണ് മരണത്തിന് കീഴടങ്ങിയത്.
പോസ്റ്റ്മോർട്ട നടപടിക്ക് ശേഷം വിട്ടു കിട്ടുന്ന ബോഡി മേലേ തലശ്ശേരി മഹല്ല് കമ്മറ്റി ഖബർസ്ഥാനിൽ സംസ്ക്കരിക്കുമെന്ന് ബന്ധുക്കൾ പറഞ്ഞു.
