പൊന്നാനിക്കാരുടെ ചെറിയ നോമ്പുതുറയിലെ അവിഭാജ്യഘടകമാണ് ‘അല്ലാഹു അഅ്ലം’ എന്ന രുചികരമായ പലഹാരം.കൗതുകമുണർത്തുന്ന ഈ പേര് വരാനുള്ള കാരണം എന്തെന്നറിയുമൊ ?
‘‘റമദാനിലെ ഒരു വൈകുന്നേരം അയക്കറവീട്ടിലെ ഐസീവി അയൽവീട്ടുകാരി കുഞ്ഞീവിയെ കാണാൻ ചെന്നു. കുഞ്ഞീവി അന്നേരം ഒരു വിഭവം പരീക്ഷിക്കുകയായിരുന്നു.
മൈദയിൽ മുട്ടയും ഉപ്പുവെള്ളവും ചേർത്ത മാവുകൊണ്ട് ദോശ, പിന്നെ അതിലും വലിയ ദോശ, അങ്ങനെ വലുപ്പം കൂട്ടിക്കൂട്ടി ആറു ദോശകൾ. ഓരോന്നിലും ഓരോരോ കൂട്ടുകൾ.ഒടുവിൽ എല്ലാം ചേർത്ത് പെട്ടിപോലെ ഒരു പലഹാരം.
ഇത് കണ്ട ഐസീവി ചോദിച്ചു
‘എന്താണീ സാധനത്തിൻ്റെ പേര്?’’ പൊടുന്നനെ കുഞ്ഞീവിയുടെ മറുപടി, ‘
"അല്ലാഹു അഅ്ലം’’
(ദൈവത്തിനറിയാമായിരിക്കും!). അങ്ങനെ കുഞ്ഞീവി കണ്ടുപിടിച്ച വിഭവത്തിന് ഐസീവി പേരിട്ടു;
‘അല്ലാഹു അഅ്ലം’. ഇന്നും നോമ്പ് തീൻമേശയിൽ ‘അല്ലാഹു അഅ്ലം’ നിറഞ്ഞുനിൽക്കുന്നു.
'അല്ലാഹു അഅ്ലം’ തയാറാക്കാം:
ചേരുവകൾ
1. മൈദ ^1 കപ്പ്
2. മുട്ട ^3 എണ്ണം
3. വെള്ളം ^1 കപ്പ്
4.ഉപ്പ് ^ ആവശ്യത്തിന്
5. ഏലക്ക ^5 എണ്ണം
6. ഓയിൽ ^2 ടീസ്പൂൺ
7. പഞ്ചസാര ^4 1/2 ടീസ്പൂൺ
8. നെയ്യ് ^ ആവശ്യത്തിന്
9. നേന്ത്രപ്പഴം ^1
10. തേങ്ങ ചിരകിയത് ^1/2 കപ്പ്
11. ഈത്തപ്പഴം ^15 എണ്ണം
12. അണ്ടിപ്പരിപ്പ് ^ആവശ്യത്തിന്
13. മുന്തിരി ^ആവശ്യത്തിന്
14.കിസ്മിസ് ^ആവശ്യത്തിന്
‘അല്ലാഹു അഅ്ലം’ തയാറാക്കാം:
1. നെയ്യിൽ രണ്ടു ടീസ്പൂൺ പഞ്ചസാരയും മൂന്ന് ഏലക്കയും ചേർത്ത് മുട്ട കലക്കി പാനിൽ ചിക്കിയെടുക്കുക.
2. അരക്കപ്പ് തേങ്ങ ചിരകിയതും രണ്ടു ടീസ്പൂൺ പഞ്ചസാരയും രണ്ട് ഏലക്കയും ആവശ്യത്തിന് കിസ്മിസും അണ്ടിപ്പരിപ്പും ചേർത്ത ചേരുവ നെയ്യിൽ വഴറ്റി എടുക്കുക.
3. ഒരു നേന്ത്രപ്പഴം അരസ്പൂൺ പഞ്ചസാര ചേർത്ത് നെയ്യിൽ വഴറ്റി എടുക്കുക.
4. 15 ഈത്തപ്പഴം ചെറുതായി അരിഞ്ഞ് ചെറുതാക്കിയ അണ്ടിപ്പരിപ്പും കിസ്മിസും ചേർത്ത് മിക്സ് ചെയ്യുക.
പെട്ടി തയാറാക്കാം:
മൈദയിൽ മൂന്നു മുട്ട ചേർത്ത് ആവശ്യത്തിന് ഉപ്പും ചേർത്ത് വെള്ളമൊഴിച്ച് ദോശമാവുപോലെ കലക്കിയെടുക്കുക. പാനിൽ നെയ്യ് പുരട്ടി ഈ മിക്സ് ഒഴിക്കുക.ചെറിയ ദോശ ആദ്യം ഉണ്ടാക്കുക. വലുപ്പം കൂട്ടിക്കൂട്ടി അഞ്ചോ ആറോ ദോശ ദോശ ഉണ്ടാക്കുക.
ആദ്യം ഉണ്ടാക്കിയ ദോശയിൽ മുട്ടയുടെ ഫില്ലിങ് ചേർത്ത് നാലായി മടക്കി പെട്ടി രൂപത്തിലാക്കുക.
രണ്ടാമപെട്ടി അതിൽ വെച്ച് അടുത്ത തേങ്ങ ഫില്ലിങ് ചേർക്കുക. മടക്കി വീണ്ടും പെട്ടിരൂപത്തിലാക്കുക .
ഇങ്ങനെ നാലു ഫില്ലിങ് വെച്ച് വലിയ പെട്ടിരൂപത്തിലാക്കുക. അവസാനത്തെ വലിയ ദോശ എടുത്ത് കവർ ചെയ്ത് പെട്ടി ആക്കുക.
ഇത് ഒരു പാത്രത്തിലേക്ക് വെച്ച് വെച്ച് പഞ്ചസാര ലായനി മുകളിൽ ഒഴിക്കുക. ചെറീസ് വെച്ച് അലങ്കരിക്കുക. പലഹാരം റെഡി.
(തയാറാക്കിയത്: പി.കെ. ജമീല
