ചാലിശ്ശേരി:ഏഴു പതിറ്റാണ്ടോളം പൊതു പ്രവർത്തനരംഗത്തെ സജീവ സാന്നിധ്യമായ,84-ന്റെ നിറവിൽ നിൽക്കുന്ന നിസ്വാർത്ഥ സേവനത്തിന്റെ ഉദാത്ത മാതൃകയായ രാഷ്ട്രീയ ജനനേതാവ് പി.സി.ഗംഗാധരനെ തദ്ദേശ സ്വയംഭരണ-എക്സൈസ് വകുപ്പ് മന്ത്രി എം.ബി.രാജേഷ് അദ്ദേഹത്തിന്റെ സ്വവസതിയിൽ എത്തി ആദരിച്ചു.
തൃത്താല ബ്ലോക്ക് പഞ്ചായത്ത് പ്രസിഡന്റ് വൈസ് പ്രസിഡന്റ് പി.ആർ.കുഞ്ഞുണ്ണി, പ്രാദേശിക കോൺഗ്രസ് നേതാക്കൾ എന്നിവരോടൊപ്പം ഞായറാഴ്ച രാവിലെയാണ് എം.ബി.രാജേഷ് പി.സി.ഗംഗാധരന്റെ വീട്ടിലെത്തിയത്.നേതാക്കളുടെയും,കുടുംബാംഗങ്ങളുടെയും സാന്നിധ്യത്തിൽ മന്ത്രി പി.സി.യെ ഷാൾ അണിയിച്ച് ആദരിക്കുകയും, ആശംസകൾ നേരുകയും ചെയ്തു.
ശതാഭിഷിക്തനായ പി.സി.ഗംഗാധരന് ജന്മനാടിൻ്റെ ആദരവ്
കൂറ്റനാട്:പൊതു പ്രവർത്തന രംഗത്ത് ഏഴു പതിറ്റാണ്ട് പൂർത്തിയാക്കിയ, ശതാഭിഷിക്തനായ തൃത്താല മണ്ഡലത്തിലെ ജനകീയ കോൺഗ്രസ് നേതാവിന് ചാലിശ്ശേരി പൗരാവലിയും, കോൺഗ്രസ്സ് പ്രവർത്തകരും ചേർന്ന് സ്വീകരണവും ആദരവും നൽകി.
ചാലിശ്ശേരി മണ്ഡലം കോൺഗ്രസ്സ് കമ്മിറ്റി കടവാരത്ത് ഷോപ്പിങ് കോംപ്ലക്സിൽ സംഘടിപ്പിച്ച സ്നേഹഗംഗാദരം എന്ന പരിപാടി കെപിസിസി വൈസ് പ്രസിഡൻ്റ് വി.ടി.ബൽറാം ഉദ്ഘാടനം ചെയ്തു. മറ്റുള്ളവരുടെ പ്രയാസങ്ങളും ബുദ്ധിമുട്ടും തൻ്റേത് കൂടിയാണെന്ന് മനസ്സിലാക്കി സാധാരണക്കാരോടൊപ്പം നിന്ന് പ്രവർത്തിച്ച പി.സി.ഗംഗാധരൻ പുതിയ തലമുറക്ക് ആവേശമാണെന്ന് വി.ടി.ബൽറാം പറഞ്ഞു.
ചാലിശ്ശേരി മണ്ഡലം കോൺഗ്രസ് പ്രസിഡൻ്റ് പി.വി ഉമ്മർ മൗലവി അധ്യക്ഷനായി. കെപിസിസി നിർവാഹക സമിതി അംഗം സി.വി. ബാലചന്ദ്രൻ മുഖ്യപ്രഭാഷണം നടത്തി. വിവിധ രംഗങ്ങളിലുള്ള പ്രമുഖർപി.സി.ഗംഗാധരനെ ഷാളണിയിച്ചും ഉപഹാരങ്ങൾ നൽകിയും ആദരിച്ചു. സിപിഎം എൽസി സെക്രട്ടറി കെ.ആർ.വിജയമ്മ,ബിജെപി മണ്ഡലം സെക്രട്ടറി കെ.സി.കുഞ്ഞൻ, ലീഗ് മണ്ഡലം പ്രസിഡൻ്റ് എസ്എംകെ തങ്ങൾ, സിപിഐ സെക്രട്ടറി സൈദ് മുഹമ്മദ്,ടി.കെ സുനിൽകുമാർ, ഹുസൈൻ പുളിയഞ്ഞാലിൽ, അസീസ് ആനക്കര , ടി.കെ.സുനിൽകുമാർ, പഞ്ചായത്ത് പ്രസിഡൻ്റുമാരായ പി.ബാലൻ, വിജീഷ് കുട്ടൻ,പിഇഎ സലാം, പി.വി. മുഹമ്മദാലി, വി.വി. ബാലകൃഷ്ണൻ, മോഹനൻ പൊന്നുള്ളി, സേതു മംഗലത്ത് എ.എം. അബ്ദുള്ളക്കുട്ടി എന്നിവർ സംസാരിച്ചു.
