ആനക്കര വില്ലേജ് ഓഫീസിൻ്റെ മുൻവശത്തെ മാലിന്യങ്ങൾ നീക്കി സെൽഫി സ്പോട്ടാക്കി പരിവർത്തനം ചെയ്തു. ആനക്കര ഹയർ സെക്കൻ്ററി സ്കൂൾ എൻ.എസ്.എസ് യൂണിറ്റ്സപ്‌തദിന ക്യാമ്പിൻ്റെ ഭാഗമായാണ് ഇവിടെ വൃത്തിയാക്കിയത്.
ആനക്കര ഗ്രാമപഞ്ചായത്തിൻ്റെ സഹകരണത്തോടെ സ്നേഹാരാമം പദ്ധതി നടപ്പാക്കിയാണ് വിദ്യാർഥികൾ നാടിൻ്റെ ശ്രദ്ധ നേടിയത്. വില്ലേജ് ഓഫീസിന് മുന്നിൽ വർഷങ്ങൾക്ക് മുൻപ് പിടിച്ചിട്ട മണൽ ലോറി കിടന്നിരുന്നു. ഇതിൻ്റെ മറവിലിരുന്ന് മദ്യപാനം നടത്തുന്നതും കുപ്പികളും പേപ്പർ പ്ലേയ്റ്റുകളും ഗ്ലാസുകളും പ്രദേശത്ത് ഉപേക്ഷിക്കുന്നതും പതിവായിരുന്നു.
വില്ലേജ് ഓഫീസ് മതിലിനോട് ചേർന്നാണ് കുട്ടികൾ സ്നേഹാരാമം പണിതത്. മതിലിൽ എം.ടിയുടെ നിളയും കടവും കുട്ടികൾ വരച്ചിട്ടു. ഒപ്പം മാലിന്യ വിരുദ്ധ സന്ദേശങ്ങളും എഴുതി. ഓഫീസിന് മുന്നിലെ മരത്തിന് തറ കെട്ടി പുല്ല് വിരിച്ച് ഇരിക്കാൻ അനുയോജ്യമാക്കി. തൊട്ടടുത്ത ആലിനേയും ചായം തേച്ച്, ചിത്രമെഴുതി ആകർഷകമാക്കി.
കുമ്പിടി ജയലക്ഷ്മി ഹോസ്പിറ്റലിൻ്റെ സഹകരണത്തോടെയാണ് കുട്ടികൾ പണി പൂർത്തിയാക്കിയത്.
സ്നേഹാരാമം ആനക്കര പഞ്ചായത്ത് പ്രസിഡൻ്റ് കെ.മുഹമ്മദ് ഉദ്ഘാടനം ചെയ്തു. വാർഡ് അംഗം കെ.പി.മുഹമ്മദ് അധ്യക്ഷനായി. പി.ടി.എ പ്രസിഡൻ്റ് കെ.സുരേന്ദ്രൻ, പഞ്ചായത്ത് സ്റ്റാൻറിങ്ങ് കമ്മിറ്റി ഭാരവാഹികളായ പി.സി രാജു, പി.കെ ബാലചന്ദ്രൻ, സി.പി സവിത, ബ്ലോക്ക് പഞ്ചായത്ത് അംഗങ്ങളായ പി.സ്നേഹ, എം.ടി.ഗീത, പഞ്ചായത്ത് അംഗങ്ങളായ ഷിബു, ബീന, ജ്യോതി ലക്ഷ്മി, ദീപ, വനജ മോഹൻ, എം.പി.ടി.എ പ്രസിഡൻ്റ് ശ്രീജ സന്തോഷ്, പഞ്ചായത്ത് സെക്രട്ടറി രാജേന്ദ്രൻ, വില്ലേജ് ഓഫീസർ ഗോവിന്ദ രാജൻ, എം.പി സതീഷ്, ടി.സാലിഹ്, പി.ബഷീർ എന്നിവർ സംബന്ധിച്ചു.
