കൂടല്ലൂർ ഗവൺമെൻ്റ് ഹൈസ്ക്കൂൾ ഭാരതപ്പുഴ ക്ലബിൻ്റെ നേതൃത്വത്തിൽ പുഴ പാഠശാല സംഘടിപ്പിക്കുന്നു.ജനുവരി 24 വെള്ളിയാഴ്ച കൂടല്ലൂർ പറമ്പത്ത് കടവിൽ വെച്ചാണ് പുഴ പാഠശാല നടക്കുന്നത്.
ദേശീയ ഹരിതസേന, സ്കൂൾ സോഷ്യൽ സയൻസ് ക്ലബ്, ഫ്രൻ്റ്സ് ഓഫ് ഭാരതപ്പുഴ തുടങ്ങിയവയുടെ സഹകരണത്തോടെയാണ് പുഴ പാഠശാല സംഘടിപ്പിക്കുന്നത്. പരിസ്ഥിതി പ്രവർത്തകൻ ലത്തിഫ് കുറ്റിപ്പുറം ഉദ്ഘാടനം ചെയ്യും. പി.ടി.എ പ്രസിഡന്റ് സി.കെ അക്ബർ അധ്യക്ഷത വഹിക്കുന്ന ചടങ്ങിൽ ഹെഡ്മിസ്ട്രസ് പുഴ സംരക്ഷണ സന്ദേശം നൽകും.
നിളയിലെ മലിനീകരണത്തെക്കുറിച്ച് ഡോ. വിമൽകുമാർ പി.ജി ക്ലാസെടുക്കും. ആർട്ടിസ്റ്റ് മൃദുൽ മോഹൻ്റെ പ്ലെയിൻ എയർ പെയിൻ്റിംഗ് , പുഴ നടത്തം, പറമ്പത്ത് കടവിലെ തോണിക്കാരൻ കുന്നുമ്മൽ മജീദിന് ആദരവ്, ഭാരതപ്പുഴ ക്വിസ് എന്നീ പരിപാടികളാണ് പുഴ പാഠശാലയുടെ ഭാഗമായി നടക്കുന്നത്.
ഭാരതപ്പുഴ ക്ലബിൻ്റെ നേതൃത്വത്തിൽ നടക്കുന്ന അഞ്ചാമത് പുഴ പാഠശാലയാണ് വെള്ളിയാഴ്ച നടക്കുന്നത്. ആനക്കര പഞ്ചായത്ത് തല ഹരിത സഭയിൽ പങ്കെടുക്കുന്നതിന് മുൻപായാണ് വിദ്യാർഥികൾക്കായി ഭാരതപ്പുഴ ക്ലബ് പുഴ പാഠശാല സംഘടിപ്പിക്കുന്നത്.
