യൂ.എ.ഇ യിലെ പട്ടാമ്പി സ്വദേശികളുടെ കൂട്ടായ്മയായ ഇമാറാത്ത് പട്ടാമ്പിയുടെ ഫാമിലി ഗ്രാന്റ് ഫെസ്റ്റ് 2022 (സീസൺ 4), സമാപിച്ചു. ദുബൈ മംസാർ ഏരിയയിൽ ശബാബ് അൽ അറബി ക്ലബ്ബിൽ പ്രത്യേകം സജ്ജമാക്കിയ വേദിയിൽ പാലക്കാട് എം.പി വി.കെ ശ്രീകണ്ഠൻ, പട്ടാമ്പി എം.എൽ.എ മുഹമ്മദ് മുഹ്‌സിൻ എന്നിവർ വിശിഷ്ടാതിഥികളായി.
ചടങ്ങിൽ ദേശീയ അവാർഡ് ജേതാവ് നഞ്ചിയമ്മയെ പൊന്നാട അണിയിച്ചു ആദരിച്ചു. പ്രശസ്ത തെന്നിന്ത്യൻ നടി ഷംന കാസിം പങ്കെടുത്ത ചടങ്ങിൽ, യുവനടി മാളവിക ശ്രീനാഥിനെയും ആദരിച്ചു. പ്രശസ്ത സാമൂഹിക പ്രവർത്തക ഉമ പ്രേമനെയും പ്രത്യേക പുരസ്‌കാരം നൽകി ആദരിച്ചു.
ജെ.ബി.എസ്‌ ഗ്രൂപ്പ് ഓഫ് കമ്പനീസ് ഉടമ ഡോക്ടർ ഷാനിദ്, തിലാൽ ഗ്രൂപ്പ് ഉടമ അബ്ദുൽ സലാം ചൊക്ലി, ബെല്ലോ ട്രാൻസ്പോർട്ട് ഉടമ ബഷീർ ബെല്ലോ, മിഹ്റാൻ ട്രാവൽ ആൻഡ് ടൂർസ് സ്ഥാപന ഉടമ നിസാർ പട്ടാമ്പി എന്നിവർക്ക് ബിസിനസ്സ് എക്സലൻസ് അവാർഡ് നൽകി ആദരിച്ചു.
മാധ്യമ രംഗത്തെ മികച്ച സംഭാവനക്ക് സനീഷ് നമ്പ്യാർക്ക് പ്രത്യേക ഉപഹാരം നൽകി. സാമൂഹിക പ്രവർത്തകൻ അഷ്റഫ് താമരശ്ശേരി, അജ്‌മാൻ ഇന്ത്യൻ അസോസിയേഷൻ പ്രസിഡന്റ് അബ്ദുൽ സലാഹ് എന്നിവർ സന്നിഹിതരായിരുന്നു.
വിവിധ എമിറേറ്റുകളിൽ നിന്നായി എഴുന്നൂറിൽ പരം ആളുകൾ പരിപാടിയിൽ പങ്കെടുത്തു. ഓണസദ്യക്കു ശേഷം, വർണ്ണ ശബളമായ ഘോഷയാത്രയുമുണ്ടായി. തിരുവാതിരക്കളി, ഒപ്പന, ഭരതനാട്യം, മിമിക്രി, സിനിമാറ്റിക്ക് ഡാൻസ് എന്നീ പരിപാടികളും പ്രശസ്ത ഗായകൻ ആസിഫ് കാപ്പാട് നയിച്ച ഗാനമേളയും വേദിയിൽ അരങ്ങേറി. കൂട്ടായ്മയുടെ പ്രസിഡന്റ് രാമകൃഷ്ണൻ അധ്യക്ഷത വഹിച്ചു.
® Navas Paruvarath Dubai
