യൂട്യൂബ് ചാനലിൽ വിവാദപരാമർശങ്ങൾ നടത്തിയ പള്ളി ഇമാമിനെതിരെ കേസെടുത്തു. എടപ്പാൾ കോലളമ്പ് മസ്ജിദ് താഹീദ് ഇമാം വസീം അൽ ഹകമിക്കെതിരെ മതവിദ്വേഷ പ്രസംഗം നടത്തിയെന്ന് കാണിച്ചാണ് കോട്ടയം സൈബർ പൊലീസ് കേസെടുത്തിരിക്കുന്നത്.
മസ്ജിദ് തൗഹീദ് എന്ന യൂട്യൂബ് ചാനലിൽ ക്രിസ്മസ് തലേന്ന് 'മുസ്ലിമും ആഘോഷങ്ങളും' വിഷയത്തിൽ നടത്തിയ പ്രഭാഷണത്തിലെ പരാമർശങ്ങൾ മതവിദ്വേഷം പ്രചരിപ്പിക്കുന്നെന്ന് കാണിച്ച് ഏബിള്‍ ഫ്രാൻസിസ് നൽകിയ പരാതിയിലാണ് സൈബർ സെൽ സ്റ്റേഷൻ ഹൗസ് ഓഫിസർ ഇൻസ്പെക്ടർ എം.ജെ. അരുൺ കേസ് രജിസ്റ്റർ ചെയ്തത്.
ഈസാ നബിയെ ദൈവ പുത്രനാക്കി വിശേഷിപ്പിക്കുന്ന ക്രിസ്മസ് ആഘോഷം ഇസ് ലാമികമായി ശരിയല്ലെന്നും മുസ്ലിംകള്‍ ക്രിസ്മസ് ആഘോഷിക്കരുതെന്നും ചൂണ്ടിക്കാട്ടിയുള്ളതായിരുന്നു ഇമാമിന്റെ പ്രസംഗം.
