ഷാർജ : ഷാർജയിൽ മലയാളി യുവാവ് കുത്തേറ്റ് മരിച്ചു. പാലക്കാട് മണ്ണാർക്കാട് സ്വദേശി ഹക്കീമാണ് മരിച്ചത്. 36 വയസായിരുന്നു. സംഭവത്തിൽ പാക്കിസ്ഥാൻ സ്വദേശിയെ പൊലീസ് കസ്റ്റഡിയിലെടുത്തു.
ഇന്നലെ രാത്രി 12:30ന് ഷാർജ ബുതീനയിലാണ് സംഭവം. ബുതീനയിലെ ഹൈപ്പർമാർക്കറ്റിൽ മാനേജരാണ് കൊല്ലപ്പെട്ട ഹക്കീം. സഹപ്രവർത്തകരും പാക്കിസ്ഥാൻ സ്വദേശിയും തമ്മിൽ സമീപത്തെ കഫ്തീരിയയിൽ ഉണ്ടായ തർക്കം പരിഹരിക്കുന്നതിനിടെയാണ് ഹക്കീമിന് കുത്തേറ്റത്.
രണ്ട് മലയാളികൾക്കും ഒരു ഈജിപ്ത് പൗരനും കൂടി ആക്രമണത്തിൽ പരുക്കേറ്റതായി ബന്ധുക്കൾ പറഞ്ഞു. ദിവസങ്ങൾക്ക് മുൻപാണ് ഷാർജയിലുണ്ടായിരുന്ന ഹക്കീമിന്റെ കുടുംബം നാട്ടിലേക്ക് മടങ്ങിയത്.
