കൂറ്റനാട്: നിർമ്മാണത്തിലിരിക്കുന്ന വീടിൻ്റെ സ്ലാബ് തകർന്ന് വീണ് സ്ലാബിനടിയിൽ കുടുങ്ങിയ നിർമ്മാണത്തൊഴിലാളി മരിച്ചു. ചാലിശേരി കവുക്കോട് തട്ടാൻ വളപ്പിൽ മണി (55) ആണ് മരിച്ചത്.
കറുകപുത്തൂർ - പെരിങ്ങോട് റോഡിലെ പെട്രോൾ പമ്പിന് സമീപം മതുപ്പുള്ളി സ്വദേശി കണ്ടേങ്കാട്ടിൽ അൻവറിനായി നിർമ്മിക്കുന്ന വീടിന്റെ രണ്ടാം നിലയുടെ വാർപ്പിനായി സ്ഥാപിച്ച മുട്ടുകൾ പൊളിക്കുന്നതിനിടയിൽ ബുധനാഴ്ച പകൽ 3.30നാണ് അപകടം .
രണ്ടാം നിലയിൽ നിന്നിരുന്ന പ്രധാന പണിക്കാരനായ മണിയുടെ തലയിലേക്ക് ഭാരമേറിയ സ്ലാബ് പതിക്കുകയായിരുന്നു. തൽക്ഷണം മരിച്ചതായി ദൃക്സാക്ഷികൾ പറയുന്നു. ചാലിശ്ശേരി പോലീസ് ഇൻക്വസ്റ്റ് തയ്യാറാക്കി.
കൂടെയുണ്ടായിരുന്ന മറ്റൊരു തൊഴിലാളി ചാലിശേരി കവുക്കോട് തട്ടത്താഴത്ത് ഷംസുവിൻ്റെ കൈകൾക്ക് ചെറിയ പരിക്കേറ്റു. ചാലിശ്ശേരി പോലീസ് ഇൻക്വസ്റ്റ് നടപടികൾ പൂർത്തിയാക്കി പോസ്റ്റ്മോർട്ടത്തിനായി തൃശ്ശൂർ മെഡിക്കൽ കോളേജ് ആശുപത്രിയിലേക്ക് മാറ്റി.
ഭാര്യ: കുഞ്ഞുമോൾ (ചാലിശ്ശേരി റോയൽ ഡൻ്റൽ കോളേജ് ജീവനക്കാരി ). മക്കൾ: ഹിമ, വിഷ്ണു .മരുമകൻ: വിജീഷ് .സഹോദരങ്ങൾ: മാളു, മീനാക്ഷി ,പരേതനായ ഭാസ്ക്കരൻ.
